OPPOSITION
PARTIES SAY THEY WILL COMPLAIN TO THE SUPREME COURT ABOUT THE SECURITY
COMMITTEES: 02/06/2004
UCID
Iyo KULMIYE Oo Sheegay Inay Maxkamad Geynayaan
Xeerka Xukunka Degdegga Ah
Somaliland.Org Hargeisa,
Labada Xisbi ee UCID iyo KULMIYE ayaa sheegay inay
maxkamad geynayaan dacwad lid ku ah xeerka Xukunka degdegga ah (Public Order Law), kaas
oo uu golaha
Wakiilladu laalay 1999kii,n sidaas darteedna
ay ku tilmaameen sharci darro.
Xeerkaas oo uu Guddiga Nabadgelyada
Hargeysa dhowaan ku xukumay 156 dhallinyaro oo lagu qabtay mudaharaadkii
dhacay 18kii May xadhig u dhexeeya Lix Bilood
ilaa Sannad, ayaa Guddoomiyaha Golaha Wakiillada Mudane Qaybe waxa
uu sheegay mar xisbiga KULMIYE waydiistey Golaha Wakiillada iyo Maxkamadda Sare inay tirtiraan
ku dhaqanka xeerkaas in xeerkaasi sharci yahay, go'aankii
lagu laalayna uu burey markii
goluhu cod ku diidey dacwad dacwad
dastuuri ah oo ay 36 mudane soo jeediyeen
in lagu soo oogo Madaxweynihii hore Marxuum Maxamed Ibraahim Cigaal.
Sidaa darteed, shirka Jaraa'id ee ay labada xisbi
wadajirka u qabteen maanta waxa lagu
soo bandhigay nuqulka go'aankii golaha Wakiilladu ku laalay xeerkaas
oo uu saxeexay
Guddoomiyaha Golaha Wakiillada mudane Axmed Maxamed Aadan (Qaybe) iyo Xoghayaha
Guud ee golaha
Maxamed xuseen Cismaan, kaas oo u qornaa
sidatan:
GW/KF-08/99/99 01/08/99
GO'AAN BURIN XEER LR. 21 EE 1963 PUBLIC ORDER LAW
GOLAHA WAKIILLADU
MARKUU
ARKAY qodobada 40,41, 42,
44, 45, 59, 124, 125 iyo 55 ee
Dastuurka JSL.
MARKUU ARKAY Mooshinka mudanayaashu soo qaddimeen 14/07/99 iyo
10/11/99 ee la xidhiidha xukunka degdegga ah, kana warhelay in dalka lagaga dhaqmo xeerka
Nabadgelyada Guud (Public
Order Law, no 21) ee soo baxay 1963kii.
MARKUU OGAADEY In xeerkani ka kooban
yahay:
- Qayb u baahan xeerar gaar ah in laga soo saaro,
sida kan huteelada hurdada,
- Kuwo ka mid ah xeerarka Guud ee garsoorka
ee hadda la adeegsado,
- Kuwo xeerar gaar ah leh sida
kan dhaqan celinta dhallinyarada (Juvinile),
- Kuwo ka hor imanaya Dastuurka, shareecada Islaamka iyo baaqyada caalamiga
ah ee xaquuqda aadamaha oo xukuumadda
SL saxeexday.
MARKUU
ISTUSAY In kuwa aan waafaqsanayn dastuurka iyo shareecadu noqonayaan waxba
MARKUU KU QANCAY in aanay dalka
ka jirin nabadgelyo darro gaadhsiisan xaalad xukun degdeg
ah Alle mahadi ha ka gaadhee
MARKUU AQOONSADAY: In hay'adihii sharci
fulintu (Waaxad Garsoorka, ciidamada Boliska iyo Asluubtu)
dhisan yihiin itaal kasta ha lahaadeene.
MARKUU TIXGELIYEY: Soo jeedinta
guddida farsamo iyo la taliyaha sharciga ee goluhu
soo bandhigeen iyo aaraada doodda
mudanayaashu kaga baaraan degeen mawduuca mudadii u dhexaysey 14-17/7/99.
MARKUU U CODEEYEY: qodobada nuxurkii
dooddu ku soo ururtay, fadhigii
27/07/99 oo ay goob joog ahaayeen 54 mudane.
Wuxuu cod aqlabiyad ah (49 cod) oo gacantaag ah ku ansixiyey qodobada go'aankan ee hoos
ku qoran, halka uu ka diidey
hal (1) mudane, saddex (3) mudne oo kalena ka aamustay,
guddoomiyuhuna aanu cod bixin sida caadadu
tahay.
GO'AANKA:
1.
In xukuumaddu sida ugu firfircoon
uga shaqaysiiso hay'adaha sharci fulinta (Law Enforcement bodies) si
ay xilkooda u gutaan.
2. In Xeerka Nabadgelyada Guud (Public Order Law, no. 21 of 1963) oo
ka horimanaya dastuurka, Shareecada Islaamka iyo baaqyada caalamiga
ah ee xuquuqda aadamiga uu yahay
waxba kama jiraan (Null and Void).
3. In haddii ay dalka ku timaaddo xaalad
khalkhal gelin karta xasiloonida, amniga, kalsoonida dhaqaale, iwm, Allah inaguma keenee uu Madaxweynuhu ku tallaabsado awooddiisa ku xusan
qodobka 117 ee dastuurka, kana ansaxsado labada gole ee
Baarlamaanka sida ku qeexan dastuurka
qodobka 78 farqadda 5aad.
Maxamed
Xaaji Maxamuud Cumar Xaashi oo
ka hadlay xeerkaas iyo dadkii lagu
xidhay mudaharaadkii ka dhacay Hargeysa 18kii May ayaa isaga oo
shucuurtiisu kacsan tahay waxa uu
yidhi, "Ucid iyo KULMIYE waxay geynayaan Maxkamad Xeerka Xukunka degdegga ah". Waxa uu sheegay in dadka
ay barayaan axsaabta, si ay iyagu u ilaashadaan
sharciga iyo xaquuqdooda.
Waxa ay labada xisbi xukuumadda
ugu baaqeen inay sii dayso
dhallinyarada inta weli xidhan.